യുവപ്രേക്ഷകരുടെ പ്രിയതാരങ്ങളായ ഗോവിന്ദ് പത്മസൂര്യയും (ജി.പി) ഗോപികയും വീണ്ടും സോഷ്യൽ മീഡിയയിൽ തരംഗമാകുന്നു. വിവാഹശേഷം തങ്ങളുടെ ഓരോ കൊച്ചു വിശേഷങ്ങളും ആരാധകർക്കായി പങ്കുവെക്കാറുള്ള താരജോഡികൾ ഇത്തവണ ഗോപികയുടെ ജന്മദിനത്തോടനുബന്ധിച്ചാണ് വാർത്തകളിൽ നിറയുന്നത്. പ്രിയതമയ്ക്ക് ആശംസകൾ നേർന്നുകൊണ്ട് ജി.പി പങ്കുവെച്ച ഹൃദയസ്പർശിയായ കുറിപ്പ് ഇതിനോടകം വൈറലായിക്കഴിഞ്ഞു.
തന്റെ ജീവിതത്തിലേക്ക് ഗോപിക കടന്നുവന്നതോടെ ലോകത്തെ നോക്കിക്കാണുന്ന രീതി തന്നെ മാറിയെന്നും ജീവിതത്തിന് പുതിയൊരു കാഴ്ചപ്പാടുണ്ടായെന്നും ജി.പി ഇൻസ്റ്റഗ്രാമിൽ കുറിച്ചു. ഗോപികയ്ക്കൊപ്പമുള്ള യാത്രകളും നിമിഷങ്ങളും തനിക്ക് ഏറെ പുതുമയുള്ളതാണെന്നും വാക്കുകൾക്ക് പ്രകടിപ്പിക്കാൻ കഴിയാത്ത വിധത്തിൽ തന്നെ സ്നേഹം പഠിപ്പിച്ചതിന് നന്ദിയുണ്ടെന്നും അദ്ദേഹം കുറിച്ചു. ഗോപിക വരുന്നതിന് മുൻപും താൻ സന്തോഷവാനായിരുന്നുവെങ്കിലും, നീ വന്നതോടെ സന്തോഷത്തിന് പുതിയ തലങ്ങളുണ്ടെന്ന് മനസ്സിലായതായും ജി.പി കൂട്ടിച്ചേർത്തു.
സൗഹൃദങ്ങളും സ്നേഹവും നിറഞ്ഞ ഈ കുറിപ്പിന് ഒപ്പം ഗോപികയുടെ മനോഹരമായ ചിത്രങ്ങളും അദ്ദേഹം പങ്കുവെച്ചിട്ടുണ്ട്. ‘ജന്മദിനാശംസകൾ ഗോപൂസേ’ എന്ന് തുടങ്ങുന്ന കുറിപ്പിന് താഴെ ‘താങ്ക്യു ചേട്ടാ’ എന്ന ഗോപികയുടെ മറുപടി കമന്റും ആരാധകർ ഏറ്റെടുത്തു കഴിഞ്ഞു. ഇരുവരുടെയും കെമിസ്ട്രിയെ പ്രശംസിച്ചും ഗോപികയ്ക്ക് ആശംസകൾ നേർന്നും നിരവധി സഹപ്രവർത്തകരും ആരാധകരുമാണ് കമന്റ് ബോക്സിൽ എത്തുന്നത്. സോഷ്യൽ മീഡിയയിൽ വലിയ ചർച്ചയാവുകയാണ് ജി.പി.യുടെ ഈ പ്രണയാതുരമായ ജന്മദിന സന്ദേശം.
